Radøy kommune, med sine 269 øyar, holmar og skjer, ligg sentralt plassert i Nordhordland (sjå kart). Avstanden frå Bergen sentrum til kommunesenteret Manger er 45 km. Samla areal er 111 kvadratkilometer, og folketalet er omlag 4800. Over 80 % av landarealet ligg lågare enn 60 m.o.h., og høgste toppen er Morkefjellet med 217 m.o.h. Årleg nedbør er omlag 1600 mm.

Les meir på  tall om Radøy kommune på Statistisk sentralbyrå sine nettsider.

Næringsliv
Folket i Radøy har i uminnelege tider livnært seg av jorda og havet, kombinert med småindustri. Utviklinga spenner frå steinalderbustaden på Straume (Fosnstraumen) for over 10.000 år sidan – til vår tids oljealder med olje - og gassgigantane Mongstad og Kollsnes/Sture som næraste naboar.

Natur
Tusenårsstaden til Radøy er kulturlandskapet, representert ved området på og kring Nøttveitveten. Naturen på Radøy er rik på kontrastar, frå frodig skogsterreng til myrar, vatn og forblåste lyngområde. Radøy sitt store innslag av "kulturlandskap" gjer at øya ikkje utan grunn vert kalla "den grøne øya". Vatn og myrar, skog og kratt har etter kvart vorte opna for turgåande av ei rad med skogsvegar og stiar. Ein del av vatna har fint med aure og røye, og i skogen finn vi småvilt, noko skogsfugl og mykje rev og hjort.

Mange lune vågar og viker gjev trygge småbåthamner, og båtsport med fiske og badeliv har mange entusiastar.

Utflukter
Radøy-naturen kjem best til sin rett frå sykkelsetet, langs ein av dei mange stiane eller med kano/kajakk i vassdraga eller langs kysten. For dei som likar bærplukking eller sopp, er det mykje å henta.

Fosnstraumen (med steinalderbuplassar) er eit populært område både for fisking og dykking. Fleire av dei største fiskane(t.d. steinbit) som fridykkarar har fanga i Noreg er tatt her.

Historie
Kommunevåpenet til Radøy er hovdingkeipar, som var ein del av funna på Mangerneset. Desse funna flytta norsk båthistorie. Les meir i faldaren om Mangerkulturen.

Vogga til norsk havforsking stod på Manger. Her budde soknepresten Michael Sars med sin familie frå 1839 - 1854. Han er rekna som far til havforskinga ,og faren sitt "livsverk" vart ført vidare av sonen Georg Ossian Sars.

Kulturliv
Kulturlivet er rikt og variert, og hovudtyngda av kulturaktivitetane står meir enn 100 lag, organisasjonar og mange eldsjeler for. Investering i frivillige tiltak er svært lønsamt. Det er viktig både for kulturlivet og for samfunnet meir ålment.

Aktivitetane femner om musikk, sang og idrett, åndelege og frilyndte lag, ivaretaking av kulturminner, kultur- og kystsogedagar, festivalar og kunstnarlege uttrykksformer.

Manger folkehøgskule har ei viktig rolle for brassmusikken både lokalt, nasjonalt og til ein viss grad internasjonalt. Manger musikklag og skulemusikken representerer kommunen og regionen på ein framifrå god måte.

I 1997 fekk Radøy ein ny attraksjon gjennom etableringa av Vestnorsk Utvandringsenter. Bygdefolk reiste til USA, plukka ned ei kyrkje og og atterreiste ho på Sletta. Seinare har 5 andre bygningar frå utvandringsmiljøet vorte bygd opptatt på Sletta.

Ein anna kulturinstitusjon er Tjorehagen, eller rhododendronhagen, som er viden kjent. Hagen er ein person, Olav Tjore, sitt livsverk

Radøy Kunst Senter (RKS) er ein stifting og eit senter for framsyning av samtidskunst i Nordhordland. Galleriet er 160 m2.  Kunstsenteret har open kafé laurdagar og søndagar frå 12.00 - 16.00. Senteret har eit samarbeid med grunnskulane i regionen og syner også elevane sine arbeider. Dei tre til fem utstillingene i året som senteret har, vert annonsert i lokalpressa. For meir informasjon sjå deira nettside: www.radoy-kunstsenter.no

Kulturminne
Radøy kommune har mange kulturminne. Me kan nemna Bogatunet, Syltastova, Øvre Tveiten, Ystebøtreet, fleire restaurerte kvernhus, lokale samlingar som museet i gamleskulen på Nordanger og gamlestova på Storheim. Fleire av desse er omtala under attraksjonar, og i kulturhistorisk leksikon.

Mangfald
Gjennom alt det arbeidet som blir utført, blir det skapt lokale møteplassar for sosialt samkvem og engasjement. Det skaper lokal identitet og mangfald, er tillitsvekkande og rekrutterer samfunnsengasjerte menneskje.

For alt dette vart Radøy årets kulturkommune i Hordaland i 2004-2005, og var nominert som ein av tre til Norges kulturkommune 2005.

Radøy kommune vonar radværingar og våre gjester vil setja pris tenestetilbod og kulturelle aktivitetar i kommunen, eller på ei vandring i eit landskap rikt på kulturminne; -frå svaberg til lyngheiar-, for så å enda opp på ein av dei grøne toppane med fritt utsyn i alle himmelretningar.